Au unterem Joor findsch do e baar Zyyle zu aggduelle Eraignis!
Dr neyschti Väärs findisch immer z'ooberscht. Vyyl Spass! ;-)

Kategorien WM Flash | Sunnschtigi Väärs | Alli Väärs aazaige

Dr FC Basel isch Schwyzermaischter
Lueg, wie d'Stadt duet rootblau glänze,
Dr FC Basel duet e zwaite Stäärn ergänze.
Speetischtens jetzt muess dr FC Sion begriffe:
Mer wänn im Cupfinal au nach Stäärne griffe.
Noone glaini Warniig an FCZ - Leader Nati B:
Neggscht Saison wäärdet au iihr gegen uns wieder Stäärndli gsee!

Wo blybbt dr Summer?
Jetzt hänn doch die Ziircher grad no iihre Knallkopf in ere Rekordzyt verjagd,
Aber mit em Winter verdryybe, het’s bis jetzt noonig eso klappt.
Me miessti doch wisse, ass die Ziircher numme blagiere und liege,
Und uns bschysse, bis sich d Brätter dien biege.
Zem Bischbyyl suech y dr Summer scho vergääbe, syt Stunde,
Und au im Ziiri-Gschnätzlets hani no immer kain vo dääne Ziircher gfunde!

Federer geege Nadal
Dr Nadal, das muess ych eych verzelle
Het's Melbourne aigentligg gwinne welle
Närvees längt er sich ans Oohr, däm Groosse
Zupft sich die ganz Zyt so saubleed an siine Hoose
Die Hoose het denn, s isch nit glooge
Unser Rodscher iihm definitiv aabezooge!

Dr Wild-Maa 2017
Doo ligg y also im Spittel - Zimmer 320ig
D Bagge uffgrisse, d Zeen uuseghaue, mim Ranze goohts au ranzig.
D Ärm, dr ainti isch schweer verschtuucht, dr rächti isch im Gips,
und wenn y no so noohdängg hany s Gfyyl, y haig nimm so vyyl Grips.
D Fiess die sehn luschtig uss, wenn y si genau betracht,
dr ainti luegt linggs, dr anderi rächts, lägg wie hani glacht!
Und alles numme wäg däm Ganze,
Will y am Voogel Gryff umsverregge ha welle - als Wild Maa danze!

Ami-Waahle
Trump oder Clinton, die Amis dien spinne!
Näggscht Wuche, doo kha halt nummen ain gwinne.
Fir mi stooht aber syt langem scho fescht:
Es isch nur e Waahl zwische Cholera und Pescht!

Horror-Glöön
Im Schwoobeland händs de Bürger gsait,
Will me die Horror-Glöön deert nimm verdrait.
Duet di sone Gloon beläschtige und steere,
Denn darfsch di mit alle Mittel weere.
Wurd d Schwyz das Gsetz denn au begriesse,
Miesste mir Basler daas mit Vorsicht gniesse!
Drum pass uff, wämm ains uff d Schnuure gisch,
s kha sii, ass dä numme bi dr Negro Rhygass isch

Gehe zu Seite 1 | 2 | 3 | 4 | 5

© by Giftspritzi
www.giftspritzi.ch